Қазақстанда жалпыхалықтық табыс декларациясы кейінге қалдырылды — Қазақстан жаңалықтары

Қазақстанда жалпыхалықтық табыс декларациясы 2 жылға шегерілді. Ол 2021 жылдан бастап кезең-кезеңмен енгізілетін болады, деп хабарлайды Қаржы министрлігінің мемлекеттік кірістер комитетінің баспасөз қызметіне сілтеме жасап Stan.kz.

Жалпыға бірдей декларация тапсыруды кезең-кезеңмен енгізу бойынша ұсыныс енгізілді.

Қолданыстағы заңнамамен 2020 жылғы 1 қаңтардан бастап Қазақстан Республикасының азаматтары Жалпыға бірдей декларация тапсыруды енгізу көзделген. Осыған байланысты заңнамалық базаны, ақпараттық жүйелерді дайындау, уәкілетті органдардың деректер базасын өзектендіру, өңірлерде пилотты өткізу бойынша жұмыстар жүргізілуде.

Қарағанды облысының Осакаровка ауданындағы пилоттық жобаның нәтижелері проблемалық мәселелерді анықтады, оларды шешуге қосымша уақыт қажет етіледі. Осыған байланысты, Қаржы министрлігі жалпыға бірдей декларация тапсыруды кезең-кезеңімен енгізу бойынша үкіметке ұсыныс енгізді.

Бірінші кезеңде, 2021 жылғы 1 қаңтардан бастап мемлекеттік қызметкерлер мен олардың жұбайлары, сондай-ақ оларға теңестірілген тұлғалар және олардың жұбайлары декларация тапсыруды бастау ұсынылады. 

Екінші кезеңде 2023 жылғы 1 қаңтардан бастап мемлекеттік кәсіпорындардың қызметкерлері (оның ішінде білім беру, денсаулық сақтау, мәдениет, спорт және т.б. салаларды қоса алғанда) және олардың жұбайлары. 

Үшінші кезеңде 2024 жылғы 1 қаңтардан бастап — заңды тұлғалардың басшылары мен құрылтайшылары және олардың жұбайлары, дара кәсіпкерлер және олардың жұбайлары.

Төртінші кезеңде 2025 жылғы 1 қаңтардан бастап — халықтың қалған санаттары.

Бұл ретте әр кезеңнің қорытындысымен талдау жасалатынын, проблемалық мәселелер анықталатынын және заңнаманы, әдістемені және ақпараттық жүйелерді жетілдіру бойынша шаралар қабылданатынын атап өткен жөн.

Қазіргі уақытта жалпыға бірдей декларациялауды кезең-кезеңімен енгізу бойынша Қазақстан Республикасының заңнамасына түзетулер дайындалуда. Олар парламентке белгіленген тәртіпте ұсынылады.

Stan.kz сайтын Telegram арқылы оқыңыз. Арнамызға жазылыңыз.