Ислам әлемі үшін аса қасиетті мекен саналатын Меккедегі Масжид әл-Харам мешітінде алаңдататын оқиға болды. Ғибадатхана аумағында бір ер адам жоғарғы қабаттардың бірінен секіріп, өз өміріне қауіп төндірген, деп хабарлайды kznews.kz.
Сауд Арабиясы Ішкі істер министрлігінің дерегіне сәйкес, оқиға кезінде тек әлгі азамат қана емес, оны құтқаруға әрекет жасаған қауіпсіздік қызметінің өкілі де ауыр жарақат алған. Қауіпсіздік қызметкері ер адамды құлап бара жатқан сәтінде ұстап қалуға тырысқан.
«Қазіргі уақытта екі адам да ауруханада дәрігерлердің бақылауында. Оқиға орнында барлық ресми рәсімдер аяқталды», — деп мәлімдеді ведомство.
Аталған жағдай қоғамда кең талқыланып, үлкен алаңдаушылық туғызды. Осыған орай Масжид әл-Харамның бас имамы шейх Абдур Рахман ас-Судайс арнайы үндеу жасап, қасиетті орынға келген барлық қажыларды тәртіп пен рухани жауапкершілікті сақтауға шақырды. Ол исламда адам өмірі ең қастерлі құндылық екенін және оны сақтау шариғаттың негізгі мақсаттарының бірі екенін еске салды.
