Тұңғыш Президент және Түркістан
Мәдениет және спорт министрлігі, Астана қаласы әкімдігі және «Әзірет Сұлтан» мемлекеттік тарихи-мәдени қорық-музейінің ұйымдастыруымен өткен көрме үш бөлімге топтастырылған. Онда «Әзірет Сұлтан» мемлекеттік тарихи-мәдени қорық-музейі қорынан 60-тан астам жәдігер қойылды.
Көрменің бірінші бөлімінде Елбасы Н.Ә.Назарбаевтың 1985 жылы Қазақ КСР Министрлер кабинетінің басшысы, Тәуелсіз Қазақстанның Тұңғыш Президенті тұсындағы, бауырлас Түркия Республикасының президенттері Тұрғыт Өзал, Сүлеймен Демирел, Ахмет Сезер, Абдулла Гүл, Режеп Тайип Ердоған, Өзбекстан Республикасының тұңғыш Президенті И.Каримовпен, 2018 жылғы Түркістандағы ресми сапарларынан сыр шертетін фотосуреттері экспозициядан орын алды.
Көрменің екінші бөлімі Қожа Ахмет Ясауи мұрасына арналды. Қожа Ахмет Ясауидің артында қалған баға жетпес мұралары ХVІІІ ғасырға тән «Диуани хикмет» кітабының қолжазба және баспа нұсқалары, ХІХ ғасырда қайта көшірілген «Рисоллә дәр адаби тариқат», «Насабнама» шежіресі секілді көптеген еңбегі қойылды.
Көрменің үшінші бөлімінде Түркістан өңіріндегі киелі орындар мен тарихи ескерткіштер жайында фотосуреттер көпшілік назарына ұсынылды.
Сонымен қатар «Астана» концерт залында тұңғыш рет Қожа Ахмет Ясауидің хикметтеріне арналған композиторлар Серікжан мен Әліби Әбдінұровтардың «Әзірет қонған Түркістан» концерті өтті.
Айтулы кешке Астана қаласы мемлекеттік филармониясының академиялы симфониялық оркестрі, камералық хоры, жеке орындаушылар және Павлодар қаласынан арнайы келген вокалдық квинтет (әншілер тобы) қатысты.
Кеште Қ.А.Ясауидің хикметтеріне жазылған көптеген шығармалар орындалды. Олардың қатарында дәстүрлі әншілердің – «Расулдың ризалығы», «Салауат», «Аш, ей момын көзіңді» шығармалары, қылқобызбен – «Диуани хикмет», баянмен – «Арыстанбаб», скрипка аспаптарымен – «Күй-толғау», ақын және симфониялық оркестрмен – «Қожа Ахмет Ясауи» шығармалары орындалды.
Алмас МАНАП,
«Егемен Қазақстан»
