Алматыда бизнесменнің қызын біреулер ұрлап әкеткен — Қылмыс

Алматыда бизнесменнің қызын ұрлады деген күдікпен төрт адам ұсталды, — деп хабарлайды Tengrinews.kz тілшісі ҚР ІІМ баспасөз қызметіне сілтеме жасап.

Қаланың криминалдық полиция департаментінің мамандары төрт адамнан тұратын қылмыстық топты ұстады, олар бизнесменнің кәмелет жасқа толмаған қызын ұрлады деген күдік бар.

Қызды ұрлап әкеткендер ол үшін жарты миллион доллар ақы сұраған.

«Қылмыс 14 қарашада күндіз, қаладағы шағынаудандардың бірінде жасалған. Қызды ұрлағандар электр есеңгіреткіш құралымен қорқытып, жүргізушіні байлап, қызды көліктің салонынан алып кеткен. Кейін қыздың жақындарына ақша сұрап хабарласқан», — деді ІІМ мамандары.

Полицейлер оларды кезекшілік тәулік ішінде ұстады. Қазіргі таңда олардың әрқайсысының бұл қылмысқа қатыстылығының дәрежесі анықталып жатыр.

«Қыздың өмірі мен денсаулығына ешкімнен де, еш нәрседен де келер қауіп жоқ», — деді полициядағылар.