Қырғызстанмен шекаралас тауларда әйелді өлтірген күдікті ұсталды — Қазақстан жаңалықтары

Қырғызстан шекарасына жақын жерде полиция қызметкерлері шекарашылармен бірге ауыр қылмыс жасады деген күдікпен іздеуде жүрген 33 жастағы қазақстандықты ұстады, деп хабарлайды Stan.kz ақпарат агенттігі. 

Ұсталған ер адам Алматы облысының Жамбыл ауданында соңғы екі айда тіркелген егде жастағы әйелді өлтірді және жеке үйлерден 4 ұрлық жасады деп айыпталып отыр.

1987 жылы туған күдікті, бұған дейін бірнеше рет ұрлық және тәртіпсіздік әрекеттері үшін жауапқа тартылған. Сонымен қатар, Ұзынағаш ауылының 65 жастағы тұрғынын өлтірді деген күдікке ілінген. Күдіктінің қолынан ажал құшқан жәбірленуші 18 мамырда өзінің үйінен табылған. Күдіктінің бірнеше көрші үйлерді тонап, жәбірленушінің үйіне ұрлық жасау мақсатында кіргені анықталды, бірақ үйдің қожайыны кенеттен пайда болып, бірнеше пышақ жарақатын алған.

«Ұрлық кезінде күдіктінің қалдырған түрлі іздері бойынша, көп ұзамай жеке басы анықталды, тергеу амалдары барысында тергеушілер оның болуы мүмкін жерді анықтады. Ер адам көрші Жамбыл облысының Кордай ауданындағы таулы жерде жасырынып жүрген. Қазір тергеу амалдары облыстық басқарманың бақылауында», — деді Жамбыл аудандық полиция бөлімінің басшысы Асхат Тегенбаев.

Күдіктіге қатысты аудандық соттың шешімімен «қамауға алу» бұлтартпау шарасы таңдалды. Аталған фактілер бойынша сотқа дейінгі тергеу Қазақстан Республикасының қылмыстық кодексінің 99-бабына  және 188-бабына сәйкес жүзеге асырылады. Айғақты зат ретінде қылмыс орнынан алынған асүй пышағы, сондай-ақ бірнеше үйден ұрланған мүлік іс материалдарына ілінген.