Маңғыстау облысында жалған дипломмен сабақ берген мұғалімдер анықталды

Маңғыстау облысының прокуратурасы колледждерде жалған дипломдармен жұмыс жасаған қызметкерлерді анықтады.

Талдау кезінде жалған құжатты пайдаланудың 8 дерегі анықталды, яғни Ақтау колледждерінде 5 оқытушы, Қарақия ауданында 3 оқытушы заңсыз жұмыс істеген. Прокурорлар барлық фактілер бойынша сотқа дейінгі тергеп-тексеруді бастап, материалдарды одан әрі тергеп-тексеруді жүргізу үшін полиция органдарына жолдаған.

Мысалы, құқық бұзушылардың бірі 2 жыл бойы Қарақия кәсіптік колледжінде жалған дипломмен тамақтандыруды ұйымдастыру бойынша оқытушының жұмысын атқарған. Қарақия ауданының соты оны ҚР Қылмыстық кодексінің 385-бабының 3-бөлігі («Көрінеу жалған құжатты пайдалану») бойынша 30 сағат қоғамдық жұмыстар түрінде жаза тағайындаумен қылмыстық жауаптылыққа тартты.

Осы тектес құқық бұзушылық үшін аталған сот сол колледждің басқа 2 оқытушысына қатысты үкім шығарды, олар жұмыстан босатылды.

Төрт эпизод бойынша полиция органдарының сотқа дейінгі тергеп-тексеру жүргізген қылмыстық істері рақымшылық актісі бойынша тоқтатылды. Бір дерек бойынша сотқа дейінгі тергеп-тексеру әрекеттері жүргізіліп жатыр.

Айта кетсек, былтыр прокуратура ұқсас фактілер бойынша 14 қылмыстық істі тіркеген және осы бағыттағы жұмыстарды жалғастырады.