Алматыда 7 жасар баланың зорлануы. Оқу-ағарту министрлігі мәлімдеме жасады
Алматыдағы мектепте жеті жасар баланың зорланғаны туралы ақпарат тарағаннан кейін Оқу-ағарту министрлігінің Балалар құқығын қорғау комитеті мәлімдеме жасады, — деп хабарлайды Kznews.kz тілшісі.
«Аталған факт бойынша қылмыстық іс қозғалды. Оқиға Комитет пен құқық қорғау органдарының бақылауында. Балалардың құқықтарын қорғау комитетінің төрағасы зардап шеккен баланың анасымен және халықаралық мектептің басшылығымен байланыста. Баланың отбасына көмек ұсынылды», — делінген хабарламада.
Комитет БАҚ өкілдеріне жүгінді.
«Комитет БАҚ өкілдерінен жариялаған әрбір ақпаратқа барынша жауапкершілікпен қарауды сұрайды. Себебі, бізге бала туралы деректердің құпиялығын сақтау және оны қоғамда таратпау маңызды. Осылайша қиын жағдайға тап болған бала мен отбасының тыныштығын қамтамасыз ете аламыз», — делінген хабарламада.
Еске сала кетейік, оқиға туралы жәбірленуші баланың анасы хабарлаған болатын. Әйел жеті жасар балаға не болғанын егжей-тегжейлі сипаттап, видео түсірген.
