Алматы облысында жоқ мұғалімдерге 609 млн теңге жалақы төленген

Алматы облысының білім беру саласында «жоқ жандарға» 609 миллион теңгеден астам қаржы аударылды. 13 мұғалім тек қағаз жүзіндегі  жалақыны алып отырған, — деп жазады Kznews.kz Orda.kz сайтына сілтеме жасап.

Бұл туралы облыстың Антикор департаменті хабарлады.

Осы фактілер бойынша алты есепшіге қатысты қылмыстық іс қозғалды. Олардың бірі бұған дейін сотталып, алты жылға бас бостандығынан айырылған. 81 млн теңге залал толығымен өтелді,  деп түсіндірді ведомство.

Сондай-ақ есепшілер мұғалімдермен сөз байласып, жалақыны көбейткен төрт факті анықталды. Мұндай бұзушылықтардың жалпы сомасы 81 миллион теңге болды.

«Бір факті бойынша есепші мен төрт мұғалім 3 жылдан 6 жылға дейін бас бостандығынан айырылып, қылмыстық жауапкершілікке тартылып, келтірілген 62 миллион теңге залал толығымен өтелді» деп хабарлады Антикор.

Мамандардың айтуынша, мектеп қызметкерлерінің ақшасын осылайша ұрлау мүмкіндігі қазынашылық деректер базасымен Parus-Kaz және 1С жүйелерінде сәйкестіктің жоқтығынан болған.

фото: sputnik.kz