Астана әуежайы маңындағы өрт аумағы ұлғайды: өртті 40 адам сөндіруде
Желіде Астана халықаралық әуежайындағы ұшу-қону жолағына жақын жерде қураған ағаштың жанып жатқаны түсірілген кадрлар пайда болды. Оқиғаға қатысты елорданың Төтенше жағдайлар департаменті түсініктеме берді.
Бүгін таңертең әлеуметтік желілерде елорда әуежайы маңында ірі өрт шыққаны туралы ақпарат пайда болды. Астана қалалық Төтенше жағдайлар департаментінің баспасөз қызметі оқиғаның мән-жайын түсіндірді. «13 сәуір күні сағат 12:28-де Астана қаласының Төтенше жағдайлар департаментінің өрт сөндіру бөлімшелері Халықаралық әуежай бағытынан келіп түскен қоңырауға ден қойды. Оқиға орнына жеткенде шамамен 1 гектар алаңда қураған ағаш пен қамыстың жанып жатқаны анықталды», – деп хабарлады елорданың Төтенше жағдайлар департаменті. Ал Astanovka98 Telegram-арнасында елорда әуежайындағы ұшу-қону жолағынан алыс емес жердегі қызыл жалынның видеосы жарияланды. Артынша оқиға орнынан куәгерлер жаңа видеолар жариялай бастады.
Елордалық Төтенше жағдайлар департаментінің баспасөз қызметі өрт сөндірушілер қазір өрт сөндіру жұмыстарын жалғастырып жатқанын хабарлады. «Сағат 14:30-дағы жағдай бойынша қураған ағаш пен қамыс өртенген аумақ шамамен 3 гектарды құрайды», – деп хабарлады қалалық Төтенше жағдайлар департаменті. Белгілі болғандай, қазір өртті жою үшін оқиға орнында 40 адам жұмыс істеп жатыр, Астана қаласы Төтенше жағдайлар департаментінің 5 техникасы мен қала әкімдігінің 4 суару техникасы жұмылдырылған. Құрбандар мен зардап шеккендер жоқ. Өрттің шығу себебі анықталатын болады. «Өртті сөндіру күшті жел мен құрғақ өсімдіктерден болып, өрттің тез таралуына байланысты қиындауда», – деп хабарлады ТЖД. Ал Астана әуежайының баспасөз қызметі NUR.KZ тілшісіне өрттің әуежай жұмысына әсер етпегенін айтты. «Өрт әуе айлағының қызметіне әсер еткен жоқ, әуежай штаттық режимде жұмыс істеп тұр», – деп хабарлады әуежайдан.
