Қазақстанда жаңа туған нәресте коронавирустан көз жұмды

Қазақстанда коронавирустан жаңа туған нәресте көз жұмды, деп хабарлайды Sputnik Қазақстан.

Баланың туылғанына небәрі 11 күн болған. Оған инсульт, жүректе қанның ұю диагнозы қойылды.

Нұр-Сұлтан педиатрлар қауымдастығының жетекшісі Сагира Әбдірахманова қиын жағдай туралы айтып берді.

«Біз 11 күндік нәрестеден айырылып қалдық. Себебі анасы жүктіліктің 39-шы аптасында инфекция жұқтырған. Босанғаннан кейін 5-ші күні балада өте ауыр клиникалық белгілер байқала бастады. Балада мидың зақымдануы болған. Яғни балада инсульт дамыған. Артынша біз баланың жүрек қантамырларында тромб қалыптасқанын байқадық», – деді педиатр.

Дәл осындай белгілері бар екінші бала да қазір ауруханада жатыр. Оның туылғанына небәрі 20 күн болған.