Пенжім ауылындағы жаппай төбелестен кейін 16 жасар оқушы ауруханаға түсті (ВИДЕО)
Алматы облысының Панфилов ауданы Пенжім ауылында жаппай төбелес болып, бір жасөспірім ауруханаға түсті, деп хабарлайды KZNEWS.
Жаппай төбелестің видеосы әлеуметтік желіде тарады. Видеоны түсірген белгісіз адам бұл — қазақ пен ұйғыр арасындағы ұлтаралық жанжал екенін айтады.
Жағдайды Алматы облысының полиция департаменті растады.
«27 қазан күні Панфилов аудандық орталық ауруханасы Пенжім ауылындағы мектеп аумағынан 16 жасар жасөспірім дене жарақатымен келіп түскен. Тексеру барысында 9 және 10-сыныпта оқитын екі оқушының арасында ауызша дау-дамай туып, оның соңы оқушылар арасындағы төбелеске ұласқаны және оның салдарынан жасөспірімнің зардап шеккені белгілі болды» делінген хабарламада.
Аталған факті бойынша ҚР ҚК 106-бабының 2-бөлігі негізінде қылмыстық іс тіркелді, жанжалға қатысушылардың барлығы анықталды.
Қазіргі уақытта зардап шегушінің жағдайы тұрақты, оған қажетті медициналық көмек көрсетілді.
Ауыл азаматтары мен аудан әкімі, ақсақалдар және Алматы облысы ПД бастығы тарапынан кездесулер мен түсіндіру жұмысы жүргізілді.
«Қазіргі уақытта жағдай тұрақты және бақылауда» деп атап өтті полиция
.
