Бүгін, 15:53
АҚШ-та қазіргі әкімшіліктің әрекеттеріне халықтың наразылығы күннен-күнге күшейіп келеді. Ел бойынша мыңдаған адам митингілерге шығып, Ливандағы геноцидті тоқтатуды және Иранмен уақытша емес, тұрақты бейбіт келісім жасауды талап етуде, деп хабарлайды kznews.kz РЕН ТВ арнасына сілтеме жасап.
Наразылық көтерілісіне НАТО-ға мүше өзге елдердің тұрғындары да қосылып жатыр. Невада штатындағы әскери әуе базаларының бірінің маңында өткен митингіде РЕН ТВ тілшісі Николай Мастеров болды.
«Менің артымда соғысқа қарсы акцияға қатысушылар тұр, митинг Лас-Вегаста өтіп жатыр. Ұйымдастырушылар жергілікті ардагерлер одағы бұл қиылысты бекер таңдаған жоқ. Бар-жоғы 50 метр жерде Неллис әскери әуе базасы орналасқан. Қатысушылар саны көп болмаса да, мұндай акциялар қазір бүкіл ел бойынша өтіп жатыр. Ең ауқымдылары Сан-Франциско, Сан-Диего және Сиэтл қалаларында ұйымдастырылған. Америкалықтар АҚШ-тың Таяу Шығыстағы әскери әрекеттерін тоқтатуды талап етуде», – деді тілші.
Акцияға ардагерлер, мұғалімдер мен медицина қызметкерлері қатысуда. Олардың талаптары қарапайым – соғысты тоқтатып, қаржыны ел ішіндегі мәселелерге бағыттау.
«Бомбаларға қанша ақша жұмсалып жатқаны маған бейжай емес. Менің ойымша, біздің елде өмір сүру жағдайы жақсырақ болуы керек: медицина, баспана, білім беру деңгейі жоғары болуы тиіс. Ал Неллис базасында күмәнді дүниелер көп: онда жасанды интеллектті ұшқышсыз аппараттарға енгізу бағдарламасы дамытылып, түрлі жаттығулар өткізіледі. Ондағының бәрі өте қымбат», – деді белсенді Карен.
Иранмен атысты тоқтату туралы жарияланғаннан кейін, Ақ үйдің қарсы алдында да акция өтті. Адамдар Иранмен уақытша емес, тұрақты бейбітшілік орнатуды талап етті.
«Қазіргі АҚШ әкімшілігі әлемді төңкеріп жіберді, бұл маған ұнамайды. Олар жазықсыз адамдарды өлтіріп жатыр», – деді шеруге қатысушы Донна Дитон.
Нью-Йорктегі Таймс-скверде де мыңдаған адам шеруге шығып, Израиль әуе күштері соққы жасап жатқан Ливандағы геноцидті тоқтатуға шақырды.
Наразылық толқыны Батыс елдерін де қамти бастады. Лондонда Иран туын ұстаған көтерісшілер Израиль елшілігіне баратын жолды және оған жақын көшелерді жауып тастады. Канададағы Монреаль қаласында да жүздеген адам Таяу Шығыстағы ұзаққа созылған қақтығысқа қарсы шығып, қазіргі әлсіз әрі сенімсіз бітім жағдайында мәселені дипломатиялық жолмен шешуге шақырды.
