6 сәуір, 2026
Қазақстанда зейнетақы жинақтарын пайдалануға қатысты жеткіліктілік шегін қайта қарау ұсынылды, деп хабарлайды kznews.kz.
Еңбек және халықты әлеуметтік қорғау министрлігі зейнетақы жинақтарын пайдалану қағидаларына өзгерістер енгізу жөніндегі түзетулер жобасын қоғамдық талқылауға шығарды. Құжат 21 сәуірге дейін «Ашық НҚА» порталында жарияланған.
Министрлік ұсынған өзгерістерге сәйкес, жинақтың ең төменгі жеткіліктілік шегін есептеу тәсілі қайта қаралады. Атап айтқанда, есептеу кезінде кейінге қалдырылған өмір бойғы зейнетақы аннуитетінің құнын ескеру көзделіп отыр.
Ведомство бұл шаралар болашақтағы БЖЗҚ төлемдерінің көлемін арттыруға және олардың тұрақтылығын қамтамасыз етуге мүмкіндік береді деп санайды.
Еңбек және халықты әлеуметтік қорғау министрі Асқарбек Ертаев бұл бастаманы зейнетақы жинақтарын мерзімінен бұрын пайдалану үрдісінің артуымен байланыстырды.
«Бірыңғай жинақтаушы зейнетақы қорының деректеріне сәйкес, зейнетақы жинақтарын ең жиі алатындар – 20–35 жас аралығындағы азаматтар. Соңғы бес жылда алынған қаражат көлемі шамамен 5 трлн теңгеге жетті», – деді министр.
Айта кетейік, жеткіліктілік шегі – азаматтардың БЖЗҚ-дағы жинақтарының белгілі бір бөлігін тұрғын үй жағдайын жақсартуға немесе емделуге пайдалану мүмкіндігін анықтайтын негізгі көрсеткіш.
Қазіргі уақытта құжат қоғамдық талқылауда, ұсыныстар мен пікірлер 21 сәуірге дейін қабылданады.
