Концерттік бағдарламаға әлемнің 29 елінен көрермендер билет сатып алған
Дженнифер Лопестің Алматыда өтетін концерті Қазақстан экономикасына 5 млрд теңге әкеледі, деп хабарлайды Kznews.kz
10 тамыз күні Алматының Орталық стадионында жылдың ең ауқымды шараларының бірі — әнші Дженнифер Лопестің концерті өтеді. Ұйымдастырушылардың мәліметінше, шоуға билеттерді АҚШ, Германия, Қытай, Түркия, БАӘ, Мексика және ТМД елдерін қоса алғанда 29 елден көрермендер сатып алған.
Билеттердің 30%-ын шетелдік қонақтар иеленген — бұл шамамен 8 мың турист. Сарапшылардың бағалауы бойынша, олар Алматыда 3-тен 5 күнге дейін аялдап, қала экономикасына шамамен 5 млрд теңге қалдырады.
«Бұл оқиға Қазақстан нарығының әлемдік деңгейдегі іс-шараларға дайын екенін көрсетеді. Тур толықтай коммерциялық негізде, мемлекеттік бюджеттен бір тиын да жұмсалмайды»”, – дейді «Астана Концерт» продюсері Малик Хасенов.
Еске салсақ, билеттердің бағасы 40 мыңнан 180 мың теңгеге дейін, орташа құны — 90 мың теңге. Орындықтағы билеттер небәрі 6 сағатта сатылып кеткен, қазір сатылымда фан-зона мен би алаңына шамамен 2,5–3 мың билет қалған.
