17 желтоқсан, 2025
Қазақстан Республикасы Сыртқы істер министрлігінің бірінші орынбасары Ержан Ашықбаев әлеуметтік желіде тараған Ақжарқын Тұрлыбайға қатысты ақпаратқа пікір білдірді, деп хабарлайды kznews.kz.
Ведомство өкілінің айтуынша, Қытайда өмір бойына бас бостандығынан айырылған Ақжарқын Тұрлыбай қазіргі уақытта Қазақстанға жеткізілген жоқ. Дегенмен, оның елге қайтарылуы үшін тиісті жұмыстар атқарылып жатыр.
Ержан Ашықбаев бұл мәселе оның тікелей құзыретінде емес екенін айтып, нақты қандай шаралар қолданылып жатқанын әзірге айта алмайтынын жеткізді.
"Бұл мәселе менің тікелей бақылауымда болмағандықтан, қандай жұмыстар жүргізіліп жатқанын нақты айта алмаймын. Егер жазбаша сауал жолданса, ақпарат беруге дайынбыз. Ақжарқын Тұрлыбай – Қазақстан Республикасының азаматы болғандықтан, бұл мәселе үнемі назарымызда. Үміт бар, алайда оның қалай жүзеге асатынын уақыт көрсетеді", – деді ол.
