Спорт алаңдарындағы сенбілік: 5000 қазақстандық жас бір мақсатқа бірікті
Астанадағы Триатлон саябағында және еліміздің өзге де қалаларындағы спорт алаңдарында бүгін ерекше белсенділік байқалды. Қазақстанның 20-дан астам қаласында бір мезгілде өткен #жаттығу жобасының жаңа маусымы ресми түрде басталды, деп хабарлайды kznews.kz.
Шара LED-экран арқылы тікелей көрсетіліп, мыңдаған жасты ортақ қимыл мен тәртіпке үндеді. Шамамен 5000 қатысушының таңғы жаттығуы — жай ғана дене шынықтыру емес, қоғамдық сананы қалыптастыруға бағытталған қозғалыс ретінде бағаланды. 2022 жылы «Дала Қырандары» ұйымының бастамасымен қолға алынған бұл жоба бүгінде жастар арасында жаңа өмір салтына айналуда.
Астанадағы іс-шараның ашылуында ұйым үйлестірушісі Нұрғали Тұрсынғазиев «Таза Қазақстан» тұжырымдамасының мәнін атап өтті. Оның айтуынша, ел тазалығы — әр азаматтың жеке жауапкершілігі.
«Тазалық дегеніміз — біреу жинаған жерде емес, ешкім ластамаған ортада сақталады. Сондықтан өз аулаларымыз бен қаламызға қамқор болу — күнделікті әдетімізге айналуы тиіс», – деді ол.
Осы үндеуден кейін елордалық қатысушылар жаттығуға кірісіп, артынан саябақты тазалап, спорттық құрал-жабдықтарды жаңартты. Сонымен бірге әр алаңда ақпараттық тақталар орнатылып, тұрғындарға арналған тегін жаттығу кестелері ілінетін болды.
Ұйымның белсенді мүшесі Сағида Зейнадилова:
«Балалар қауіпсіз ортада ойнасын десек, тазалық пен тәртіпті мәдениетке айналдыруымыз қажет. Бүгін еліміздің әр өңіріндегі 5000 жас өз алаңында бірікті. Енді әр жаттығу аймағына «қырандар» жауапты болады», – деді.
Айта кетейік, жоба Туризм және спорт министрлігінің ресми қолдауымен жүзеге асырылып келеді. 2024 жылы қол қойылған меморандум аясында жоба тек спортпен шектелмей, қоғамдық жауапкершілік пен ортақ сана қалыптастыруға бағыттала бастады.
Астанадан бастау алған бұл бастама бүгінде Шымкент, Қарағанды, Орал, Семей және басқа қалаларда да жалғасын табуда.
