Бүгін, 12:27
Атырау облысында болған жол апатынан Қызылқоға ауданы әкімінің орынбасары Ерболат Игали көз жұмды. Ол қызметтік көлікпен жұмысқа бара жатқан, деп хабарлайды "Ақ Жайық".
Қайғылы оқиға бүгін таңертең Атырау облысындағы тасжолдардың бірінде болған. Алдын ала мәлімет бойынша, ішінде аудан әкімінің орынбасары болған қызметтік автокөлік жолда аударылып кеткен.
Көлікте Ерболат Игали мен жүргізуші болған. Апат салдарынан шенеунік оқиға орнында қаза тапты. Ал жүргізуші аман қалған.
Ерболат Игалидің қайтыс болғаны туралы ақпаратты Атырау облысының әкімдігі растады.
"Қызылқоға ауданы әкімінің орынбасары Ерболат Айдынғалиұлы Игалидің кенеттен қайтыс болуына байланысты отбасына, туған-туыстарына, жақындары мен әріптестеріне көңіл айтамыз", – делінген облыс әкімдігі таратқан хабарламада.
Марқұм 45 жаста болған. Келесі айда ол 46 жасқа толар еді. Оның артында бес баласы қалды.
Ерболат Игали еңбек жолын жергілікті газетте тілші болып бастаған. 2023 жылдың қаңтар айынан бастап Қызылқоға ауданы әкімінің орынбасары қызметін атқарып келген.
