Бүгін, 11:45
Әлеуметтік желілерде Алматы облысындағы аудандық полиция бөлімінің бастығының орынбасары Бауыржан Қабдулданов қызметтік көлікпен өз жұбайын қағып өлтірді деген ақпарат тарады, деп хабарлайды kznews.kz kursiv.media-ға сілтеме жасап.
Облыстық полиция департаментінің хабарлауынша, көлік қағу салдарынан әйел алған жарақаттарынан оқиға орнында көз жұмған.
37 жастағы полиция бастығының орынбасары ұсталып, уақытша ұстау изоляторына қамалды. Оған қатысты Қылмыстық кодекстің 345-бабы 3-бөлігі бойынша (жол қозғалысы ережелерін немесе көлік құралдарын пайдалану қағидаларын бұзу, абайсызда адам өліміне әкеп соғу) қылмыстық іс қозғалды.
Қазір оқиғаның барлық мән-жайын жан-жақты әрі объективті анықтау үшін қажетті тергеу амалдары жүргізіліп жатыр.
Өңірлік полиция департаменті тергеу барысын ерекше бақылауға алған.
«ҚР ҚПК-нің 201-бабына сәйкес өзге ақпарат жария етілмейді», — деп мәлімдеді ведомство.
Бұған дейін БАҚ-та ерлі-зайыптылар көлікте бірге келе жатқанда араларында жанжал шыққаны хабарланған еді. Тергеу кезінде ер адам әйелінің қозғалыс кезінде көліктің есігін ашпақ болғанын айтқан. Оның сөзінше, кейін жұбайын Бақбақты ауылының маңына түсіріп кетіп, жолын жалғастырған.
Бірнеше шақырым жүрген соң, ер адам әйелін қайта алып кету үшін кері бұрылғанын жеткізген. Алдын ала нұсқа бойынша, әйел жолдың ортасында отырғандықтан, полицей оны байқамай қалып, қағып кеткен.
Тергеу мәліметінше, әйелдің расында жол бойында отырғаны алдын ала расталған.
Полицей қызметтік көлікті мінген, себебі оған дейін қызметтік шаруамен Қонаев қаласына барып қайтқан. Оқиға салдарынан көліктің алдыңғы бампері зақымдалып, радиаторы қисайған.
