Бүгін, 10:18
20 қаңтар күні Шымкентте болған жол апатынан кейінгі жанжал төбелеске ұласып, салдарынан бір адам қаза тапты. Оқиғаға байланысты полиция күдіктілерді іздестіріп жатыр, деп хабарлайды kznews.kz .
Мәліметке қарағанда, оқиға Ерімбетов пен Рысқұлов көшелерінің қиылысында тіркелген. Екі көліктің жүргізушісі жол апатынан соң бір-бірімен сөзге келіп, жанжал ушыққан. Сол сәтте олардың қасына тағы бір көлік тоқтап, ішінен шыққан адамдар да дау-дамайға араласқаны айтылады.
Ары қарай жағдай бақылаудан шығып, төбелеске айналған. Қақтығыс кезінде бірнеше адам жарақат алып, екі адам ауруханаға жеткізілген. Алайда олардың бірі — 40 жастағы ер адам алған жарақатынан көз жұмған.
Полиция аталған дерек бойынша қылмыстық іс қозғаған. Құқық қорғау органдары күдіктілерді анықтап, ұстауға бағытталған шаралар жүргізіліп жатқанын мәлімдеді.
«Күдіктілерді ұстау үшін жедел-іздестіру іс-шараларына департаменттің барлық күштері мен құралдары жұмылдырылды», – деп хабарлаған полиция.
