21 маусым, 2019
Қысқа сілтеме алу
Тұрғымбаев көші-қон полицейіне жұмысын Шымкентке ауыстыруына көмектесетінін айтты
НҰР-СҰЛТАН, 21 маусым – Sputnik. Бүгін ішкі істер министрі Ерлан Тұрғымбаевтың халыққа есеп беру кездесуінде полицейдің келіншегі күйеуінің мәселесін шешіп беруді сұрады, деп хабарлайды Sputnik Қазақстан тілшісі.
Оның айтуынша, жолдасы көші-қон полициясында жұмыс істейді. Енді, жұмыс бабымен Шымкент қаласына ауыспақшы. Бірақ тиісті құжаттарға қол қойылмай жатқан көрінеді.
"Мен пәтер сұрайын деп жатқан жоқпын. Бізге өзіміздің туған жеріміз – Шымкент қаласына ауысуға тура келіп тұр. Бала-шағамыз сол жақта. Құжаттар мұнда келді. Бірақ қол қойылмай жатыр, жіберілмей жатыр. Оны не істеуге болады? Бізге көп күтуге болмайды. Пәтерде тұрамыз. Бала-шағамызбен екі жақта жүрміз", - деді полицейдің келіншегі.
Осыдын кейін министр Тұрғымбаев мәселенің мән-жайын тағы анықтап, полицейдің аты-жөнін сұрады. Осы кезде полицейдің келіншегі: "Ол менің мұнда келгенімді білмейді. Енді...көре жатармыз", - деді. Ал залда отырғандардың бәрі күліп, қол шапалақтай бастады. Министр болса, аталған мәселені шешіп беруге уәде етті.
"Мына жерде кадр департаменті бастығының орынбасары бар. Қазір бәрін жазып алыңыз. Ауыстырып береміз", - деді Тұрғымбаев.
sputniknews.kz
