Францияның Канн қаласында өтіп жатқан 78-ші кинофестиваль аясында әлемдік жұлдыздардың сәнді образдарымен бірге қазақстандық зергерлік өнер де көзге түсті. Saltanat Diamond Gallery бренді дайындаған әшекейлер бірқатар танымал қонақтардың образдарын толықтырды, деп хабарлайды Skifnews.kz порталына сілтеме жасаған kznews.kz.

Британдық актриса Ханна Уоддингем «Миссия: Мүмкін емес – Ақырғы қайтарым» фильмі көрсетілімінде сырға, білезік, сақина және кулоннан тұратын зергерлік жиынтықпен сахнаға шықты. Бұл бұйымдарды қазақстандық шеберлер әзірлеген. Оның образы Vanity Fair Italia және басқа да халықаралық сән басылымдарының оң бағасына ие болды.

фото: instagram/saltanatdiamondgallery

Сондай-ақ, фотосессия кезінде актриса брендтің басқа бұйымдарын да тағып, гүлді көйлекпен үйлестіре киген.

Фестивальде ерекше стильімен көзге түскен тағы бір есім — Фархана Боди. Кәсіпкер әрі әсер етуші қазақстандық зергерлік бұйымдарды Зухра ательесінің киімімен үйлестіріп, қызыл кілемде жарқырады. Кейінірек ол осы жиынтықты Vanity Fair-дің ресми кешіне де тағып барған. Оның образы халықаралық сән журналдары мен рейтингтерде жоғары бағаланып, Harper's Bazaar Kazakhstan оны Канн фестивалінің ең есте қаларлық образы деп атады.

фото: instagram/saltanatdiamondgallery

Қазақстандық әшекейлер Каннмен шектелмей, басқа да халықаралық алаңдарда көрсетілуде. Мысалы, «Белоснежка» фильмінің жарнамалық науқаны кезінде актриса Рэйчел Зеглер Испанияда өткен іс-шарада осы брендтің сақинасын Эли Сааб көйлегімен үйлестіріп киген.

Бұған дейін Saltanat Diamond Gallery бұйымдары Париждегі жоғары сән апталығы аясында ұйымдастырылған Precious Room көрмесінде таныстырылды. Сол жерде зергерлік бұйымдар Голливуд стилисті Сара Слудскийдің де назарын аударған.

фото: instagram/saltanatdiamondgallery

Saltanat Diamond Gallery – ұлттық дәстүр мен мәдениетке негізделген қазақ бренді. Олардың топтамаларында қазақтың ою-өрнектері мен рәміздері көрініс табады. Компанияның айтуынша, әр бұйым мұқият зерттеуді қажет етеді: дизайнерлер көне суреттер мен белгілерді жаңғыртып, қолөнер дәстүрін қайта тірілтуді мақсат етеді.

САБЫР ТҮБІ САРЫ АЛТЫН | Жұма құтбасы