Бүгінгі сот отырысында Kaspi Bank-тің заңгері Айдар Ксенбаев куәгер ретінде жауап берді.
Оның айтуынша, 2024 жылғы сәуір айында банкке Перизат Қайраттың атынан екі хат келіп түскен. Біріншісінде — 120 миллион теңге, ал үш күннен соң екіншісінде — қосымша 500 миллион теңге аудару сұралған. Банк бұл өтініштерге сәйкес, жалпы сомасы 620 миллион теңгені «Biz Birgemiz» қоғамдық бірлестігінің шотына аударған.
— 2024 жылғы 1 шілдеде Перизат Қайраттан алғыс хат келді. Онда қаражаттың қайықтар, генераторлар, қаптар секілді заттарға жұмсалғаны айтылған. Қалған бөлігі азық-түлік пен көлік қызметтеріне пайдаланылған делінген. Алайда кейін бұл қаражаттың мақсатты түрде жұмсалмағаны, нақты азаматтарға жетпей, ұрланғаны анықталды. Қазір банкке 620 миллион теңге көлемінде залал келіп отыр, — деді Ксенбаев сотта.
