21 ақпан, 2020
Коронавирус табылып, Жапония жағалауында карантинге тұрып қалған Diamond Princess кемесінде қалған екі қазақстандық карантиннен шықты. Бұған дейін круиз лайнерінен екі қазақстандықтың шыққаны хабарланған еді.
"Қазақстанның Жапониядағы елшілігінің дерегінше, бүгін (21 ақпан) Diamond Princess круиз лайнерінде болған тағы екі қазақстандық құрғаққа шықты. Олар қазір Токиодағы қонақүйлердің бірінде. Кемеде болған барлық азаматтарымыз коронавирус бойынша тестен өткен. Ешқайсысынан вирус табылмады" делінген СІМ хабарламасында.
Министрліктің айтуынша, олар 22 ақпанда Қазақстанға оралады. Осыған дейін ведомство кемеде Қазақстанның төрт азаматы: 8 және 12 жастағы немерелерімен екі әйел бар деп мәлімдеген еді.
21 ақпандағы мәліметке қарағанда, қазір Қытайда коронавирус жұқтырғандар 75 мыңнан, қаза болғандар 2200-ден асқан. Қытай билігінің дерегінше шамамен 18 мың адам коронавирустан айыққан. Орталық Азия елдерінде коронавирус жұқтырғандар жоқ.
Қарай отырыңыз: Коронавирус туралы не білу керек?
Azattyq
