Түркістан облысында емхана басшысынан ақша бопсалады деген күдікпен блогер ұсталды, деп хабарлайды kznews.kz.
Түркістан облысы полиция департаментінің ұйымдасқан қылмысқа қарсы күрес басқармасы жедел-іздестіру іс-шаралары барысында бопсалау дерегінің жолын кесті.
Полиция мәліметінше, Келес ауданында 32 жастағы жергілікті тұрғын ұсталған. Ол өзін блогер әрі қоғам белсендісі ретінде таныстырып, медициналық мекеме басшысынан әлеуметтік желілерде беделіне нұқсан келтіретін ақпарат таратпау үшін 1 миллион теңге талап еткен.
Күдікті – жұмыссыз азамат. Қазіргі уақытта аталған факті бойынша қылмыстық іс қозғалып, заттай дәлелдемелер тәркіленді. Сотқа дейінгі тергеп-тексеру амалдары жүргізіліп жатыр.
