Бүгін, 17:33
Еліміздің білім беру саласына жасанды зердені кеңінен енгізуге бағытталған ауқымды ұлттық жоба іске қосылды. Бұған дейін бұл бағдарлама Біріккен Араб Әмірліктері, Словакия, Иордания, Италия, Грекия, Эстония және Тринидад және Тобаго елдерінде ғана жүзеге асырылған. Жоба балабақшадан бастап мектеп, колледж, университеттер мен ғылыми-зерттеу ұйымдарына дейінгі барлық білім беру деңгейін қамтиды. Жоба аясында шамамен 165 мың педагогқа ChatGPT Edu платформасына бір жылдық тегін лицензия беру жоспарланған, деп хабарлайды
Бұл жобаның ерекшелігі не, білім беру процесінде қолдану тиімді ме деген сұраққа kznews.kz. жауап іздеп көрді.
Қазіргі білім беру жүйесі цифрлық трансформация кезеңінде дамып келеді және бұл үдерісте жасанды интеллект технологияларының рөлі күннен күнге артып отыр. Соның ішінде ChatGPT Edu платформасы мұғалімдердің кәсіби қызметін қолдауға арналған арнайы интеллектуал құрал ретінде ерекше маңызға ие. Бұл жүйенің негізгі мақсаты – оқыту процесін толық автоматтандыру емес, керісінше педагогтардың күнделікті жұмыс жүктемесін азайту, әдістемелік жұмыстың сапасын арттыру және уақыт ресурстарын тиімді пайдалануға мүмкіндік беру.
ChatGPT Edu оқушыларға арналған құрал емес, ол мұғалімдердің сабаққа дайындық, жоспарлау, талдау және оқу материалдарын әзірлеу процесін жеңілдететін кәсіби AI жүйесі ретінде қызмет атқарады. Платформа арқылы сабақ жоспарын құру, тест тапсырмасын генерациялау, оқу материалдарын түрлі деңгейге бейімдеу және әдістемелік құжаттарды әзірлеу процестері әлдеқайда жылдам әрі тиімді жүзеге асады. Бұрын ұзақ уақыт пен үлкен еңбек талап ететін бұл жұмыстар енді қысқа мерзімде орындалып, мұғалімдерге оқушылармен тікелей жұмыс істеуге көбірек мүмкіндік береді.
Бұл бастама әлемдік деңгейде білім беру саласындағы ең ірі AI енгізу жобаларының бірі. Лицензиялар әртүрлі білім беру мекемелері арасында таратылып, педагогтарға бірегей цифрлық экожүйеге қол жеткізу мүмкіндігі беріледі. Платформаны енгізу және белсендіру процесі BilimClass жүйесі арқылы, нақтырақ айтқанда ai.bilimclass.kz сервисі негізінде жүзеге асырылады.
«Білім беру – озық AI технологияларының мүмкіндігін баршаға қолжетімді етудегі шешуші фактор. Қазақстанның OpenAI-мен ынтымақтастығы үкіметтердің педагогтерге пайдалы құралдар, практикалық қолдау және сапалы оқыту ұсына отырып, AI сауаттылығы саласындағы алшақтықты қалай азайта алатынын көрсетеді. Бұл бүкіл білім беру жүйесіне ұзақ мерзімді оң әсер етуге мүмкіндік береді», – дейді OpenAI өкілі Кевин Миллс.
Бұл жобаның институционалдық құрылымы бірнеше серіктестің бірлескен жұмысын қамтиды. Жоба OpenAI компаниясымен бірлесіп жүзеге асырылып жатыр, Freedom Holding Corp. демеуші ретінде қатысады, ал Bilim Group технологиялық серіктес ретінде платформалық инфрақұрылымды қамтамасыз етеді.
Сонымен қатар жобаға мемлекеттік органдар мен бірнеше салалық министрліктің қатысуы оның стратегиялық деңгейде жүзеге асырылып жатқанын көрсетеді. Бұл технологиялық жаңарту ғана емес, бүкіл білім беру жүйесін цифрлық трансформациялауға бағытталған кешенді реформа.
Жобаның негізгі мақсаты – мұғалімдердің күнделікті жұмысын жеңілдету және білім беру сапасын арттыру. Бұл туралы педагогтар да өз пікірлерін білдірді. Мысалы, тарих пәнінің мұғалімі Рахат Саматұлы бұл бастаманың маңызын былай сипаттайды:
«ChatGPT Edu бізге уақытты үнемдеуге ғана емес, сабақты тереңірек жоспарлауға мүмкіндік беретін жаңа құрал болды. Ең бастысы – біз қағазбастылықтан арылып, оқушыларға көбірек көңіл бөле алатын болдық».
Бұл пікір платформаның практикалық деңгейде мұғалім жұмысына нақты әсер етіп отырғанын көрсетеді.
Bilim Group басшысы Александр Савченко білім берудегі ЖИ-дің басты артықшылығы қолжетімділік пен сапаны арттыруда екенін атап өтті.
«ChatGPT Edu – жай ғана технологиялық құрал емес. Бұл – Қазақстанның адами капиталына салынған инвестиция. Бастаманың басты мақсаты – қазақстандық педагогтерге ЖИ құралдарын меңгеріп, оларды күнделікті жұмыста тиімді қолдануға көмектесу. Біз педагогтерге ең маңызды нәрсеге – балаға көбірек көңіл бөлуге жағдай жасайтын құрал ұсынамыз», – дейді ол.
Платформаның функционалдық мүмкіндігі кең ауқымды қамтиды. Ол сабақ жоспарын автоматтандыруға, тесттер мен тапсырмалар құрастыруға, бейнематериалдар жасауға, оқу материалдарын оқушы деңгейіне бейімдеуге, әдістемелік ресурстар әзірлеуге және оқу мазмұнын әртүрлі форматта ұсынуға мүмкіндік береді. Сонымен қатар жүйе деректер қауіпсіздігіне ерекше назар аударады: пайдаланушылардың енгізген мәліметтері қорғалған ортада өңделеді және модельді оқыту мақсатында пайдаланылмайды. Бұл білім беру мекемелері үшін өте маңызды фактор болып табылады, себебі ол деректердің құпиялылығын және жүйенің сенімділігін қамтамасыз етеді.
Жобаны тиімді іске асыру үшін тек технологиялық платформа жеткіліксіз, сонымен қатар кешенді қолдау жүйесі қажет. Осы мақсатта педагогтарға арналған көпдеңгейлі сүйемелдеу механизмі енгізілген. Оған техникалық қолдау қызметі, телефон және мессенджерлер арқылы жедел кеңес беру, қысқа бейне-нұсқаулықтар, жеке AI көмекшісі арқылы тәулік бойы қолжетімділік, сондай-ақ тұрақты оқыту вебинарлары мен әдістемелік сессиялар кіреді. Бұдан бөлек AI материалдарының арнайы кітапханасы құрылып, онда білім беруде жасанды интеллектті қолданудың үздік тәжірибелері, дайын сценарийлер, вебинар жазбалары және практикалық нұсқаулықтар жинақталған. Мұғалімдер үшін арнайы теңшелетін GPT үлгілері де ұсынылып, олар нақты пәндер мен оқу мақсаттарына бейімделген интеллектуалды көмекшілерді пайдалана алады.
2025 жылғы негізгі нәтижелерге сәйкес, жоба аясында бірнеше маңызды институционалдық қадам жүзеге асырылды. OpenAI, Freedom Holding, MIICR және MNVO арасында меморандумға қол қойылды, сондай-ақ OpenAI, Freedom Holding және BMG UpSkill арасында келісімшарт жасалды. Сонымен қатар ai.bilimclass.kz платформасын дамыту басталып, білім беру ұйымдары үшін арнайы workspaces құрылымы енгізілді: балабақшалар, мектептер, колледждер, университеттер және стартап экожүйесі бойынша бөлек конфигурациялар жасалды. Бұдан бөлек OpenAI мен BMG UpSkill арасында бірлескен жол картасы қабылданып, AI-ды білім беру саласына енгізу бойынша бірқатар сараптамалық сессиялар өткізілді.
Аружан Қали,
MNU студенті
