Бұл туралы топ жетекшісі, Құрылтай депутаты Дана Медеуова Орталық Азия елдерінің бала құқықтары жөніндегі уәкілдерінің «Балалар үні: ұлттық стратегиялар және қауіпсіз цифрлық орта» атты ІІ халықаралық форумында мәлімдеді, деп хабарлайды kznews.kz.
Оның айтуынша, депутаттық топ балаларды қорғау саласындағы өзекті мәселелерді шешу үшін парламентшілердің күш-жігерін біріктірмек.
– Біздің мақсатымыз – балалардың құқықтарын қорғау, қауіпсіздігін қамтамасыз ету, денсаулығы мен тұрмыс жағдайын жақсарту мәселелерін заң шығару қызметінде басты назарда ұстау, – деді Дана Медеуова.
Форумда балалардың интернеттегі қауіпсіздігіне ерекше көңіл бөлінді. Қатысушылар заманауи технологиялардың бала дамуына ықпалын, цифрлық ортадағы қауіптерден қорғау жолдарын талқылады. Сондай-ақ барлық балаға, соның ішінде ерекше білім беру қажеттіліктері бар балаларға білім алуға тең мүмкіндік жасау мәселесі көтерілді.
Құрылтай Төрағасының орынбасары Динара Закиеваның төрағалығымен өткен жиынға Премьер-Министрдің орынбасары – Жасанды интеллект және цифрлық даму министрі Жаслан Мәдиев, Оқу-ағарту министрі Жұлдыз Сүлейменова қатысты.
Форумға БҰҰ Бас хатшысының балаларға қатысты зорлық-зомбылық мәселелері жөніндегі арнайы өкілі Наджат Маалла Мджид, Орталық Азия елдері мен Финляндияның бала құқықтары жөніндегі уәкілдері, халықаралық ұйымдар және дипломатиялық корпус өкілдері де жиналды.