Денсаулық сақтау министрі Ақмарал Әлназарова ұшақ бортында жолаушыға көмек көрсеткен оқиғаға қатысты туындаған пікірталасқа түсініктеме берді, деп хабарлайды kznews.kz.
Әлеуметтік желілерде кей қолданушылар бұл жағдайды «арнайы ұйымдастырылған PR» деп айыптаған болатын.
Мәжіліс кулуарында министр өзіне тағылған күмәндарға жауап беріп, бұл оқиға үшін ақталуға еш негіз жоқ екенін айтты.
«Әркімнің өз пікірі бар, бәріне әсер ете алмаймын. Ең бастысы өз міндетімді орындадым. Менің ақталатын жағдайым жоқ», - деді Әлназарова.
Оның айтуынша, дәл осы жағдайда кез келген медицина қызметкері көмек көрсетуге тырысар еді, сондықтан бұл оқиғада ерекше күдік тудыратын ештеңе жоқ.
Министр бұл оның алғашқы рет медициналық көмек көрсетуі емес екенін, тек осы жолы видеоға түсіріп, әлеуметтік желіге жүктелгенін айтты.
Айта кетейік, 27 қарашада Астана–Алматы рейсінде бір жолаушының денсаулығы нашарлап, қан қысымы көтеріліп, құса бастаған. Экипаж «ұшақта дәрігер бар ма» деп сұраған соң Әлназарова көмек көрсеткен. Оқиға куәгерлері түсірген видео Threads желісінде жарияланып, кей қазақстандықтардың арасында «қойылым» деген пікірталас туғызған.
