35 бала тәрбиелеп, көпке үлгі болған «Перзент» балалар үйінің жетекшісі Әмина қажы Әжібаева қазіргі қазақ әйелдерінің киім үлгісі мен тәрбиесі туры өз ойын білдірді, деп хабарлайды Kznews.kz.
Белгілі журналист Жанар Байсемізге берген сұхбатында ол жастардың киім кию мәдениетіне және ана мен әже ретіндегі үлгі кэрсету жауапкершілігіне тоқталды.
«Бүгінгі таңда қыздарымыз өздерін қалай болса солай ұстап, ашық-шашық киінуге бейім болып барады. Бұл — тек сәнге ілесу емес, жалпы ұлттық болмысымыздан алыстау», — деді Әмина апа.
Ол жастардың денсаулығы мен ұрпақ тәрбиесіне де алаңдайтынын жеткізді:
«Кейде жас келіндер, жүкті аналар да денсаулығына мән бермей, сыртқы келбетіне ғана көңіл бөледі. Салдарынан денсаулығы әлсіз балалар дүниеге келуі мүмкін», — дейді ол.
Әмина қажы үлкендерге де үндеу жасады:
«Жасы келген әйелдер — үйдің тірегі, қыздарына үлгі болатын тұлғалар. Егер үлкендер де жеңіл киінсе, олар жастарға не деп ақыл айта алады?»
Сұхбат барысында ол ұлттық құндылықтарды сақтау, отбасындағы тәрбие мен ұят мәселесңн қозғап, көпшілікті ойлануға шақырды.
