Синоптиктер жаңа аптаның басында Қазақстанның басым бөлігінде ауа райы күрт нашарлайтынын ескертті. Оңтүстік циклонның әсерінен өңірлерде қалың қар жауып, жаяу бұрқасын көтеріліп, жел күшеймек, деп хабарлайды Kznews.kz.
26 қаңтар, дүйсенбі күні атмосфералық фронттардың өтуіне байланысты республиканың барлық аумағында қар күтіледі. Солтүстік пен орталықта боран салдарынан көріну қашықтығы төмендеп, жолдағы қозғалыс қиындауы мүмкін. Ал оңтүстік-батыс және оңтүстік аймақтарда күндіз жауын-шашын түсіп, кей жерлерде қар аралас жаңбыр жауу ықтимал.
Қолайсыз ауа райы жолдағы қауіп-қатерді арттырады: бірқатар өңірде көктайғақ болуы мүмкін, көптеген аймақта тұман түсіп, жүргізушілер үшін көрініс нашарлайды. Сондай-ақ желдің күшеюі боранның қарқынын үдетіп, ашық трассаларда жағдайды күрделендіруі ықтимал.
Мамандар тұрғындарға қауіпсіздік шараларын сақтауға кеңес береді: алыс жолға шықпауға тырысу, көліктің техникалық жай-күйін алдын ала тексеру, жолда арақашықтықты сақтау және «112» қызметінен келетін ескертулер мен жолдардың жабылуы туралы ақпаратты тұрақты бақылап отыру қажет.