Home Жаңалықтар Өзбекстан сыртқы істер министрі «Талибан» басшыларымен кездесті

Өзбекстан сыртқы істер министрі «Талибан» басшыларымен кездесті

0
980

7 қазанда Өзбекстан сыртқы істер министрі Абдуләзіз Камилов бастаған делегация Кабул қаласында «Талибан» қозғалысының жетекшілерімен келіссөз өткізді, деп хабарлайды Азаттық.

Өзбекстан сыртқы істер министрлігінің мәліметінше, Абдуләзіз Камилов Ауғанстанның уақытша үкіметіндегі сыртқы істер министрі міндетін атқарушы Әмір Хан Муттақимен транзит, энергетика және сауда мәселелерін талқылады.

«Талибан» өкілдері Өзбекстан басшылығына Мазари-Шариф қаласындағы халықаралық әуежайды жөндеуге көмектескені, өзбек-ауған шекарасының үзіліссіз жұмыс істеп тұрғаны үшін алғыс айтқан.

Тараптар жақында Термез қаласында сауда-экономика сипатындағы мәселелерді, соның ішінде «Сұрқан – Пули-Хумри» электр желісі мен «Мазари-Шариф – Кабул – Пешавар» теміржол құрылысының жобасын бірлесіп талқылауға келісті, делінген СІМ хабарламасында.

Мәліметке қарағанда, тәліптер осы жобаларды жүзеге асыруға тартылатын өзбек мамандарының қауіпсіздігін қамтамасыз етуге дайын.

«Талибан» басшылығы «Ауғанстаннан бауырлас Өзбекстанға ешқандай қауіп жоқ» деп мәлімдеген.

15 тамызда «Талибан» Кабул қаласын ұрыссыз басып алды. Бірнеше күннен соң тәліптер Ауғанстан ислам әмірлігі құрылатынын мәлімдеді.

Тәліптер үкіметті басып алған соң халықаралық қауымдастық Ауғанстанға көмек беруін тоқтатты. Мемлекет ауыр гуманитарлық дағдарысты бастан өткеріп жатыр.