Мәжілісте жаңа Салық кодексінің жобасы қаралып жатыр: ҚҚС шегінің төмендеуінен бюджет 400 млрд теңгеге дейін жоғалтады дейді Kznews.kz тілшісі.
ҚР Парламенті Мәжілісінің отырысында жаңа Салық кодексі жобасы бірінші оқылымда қаралуда. Бұл туралы Премьер-Министрдің орынбасары – Ұлттық экономика министрі Серік Жұманғарин мәлімдеді. ҚҚС мөлшерлемесін 16% деңгейінде белгілеу ұсынылды.
Серік Жұманғариннің айтуынша, бизнес қауымдастығымен және депутаттық корпуспен талқылаулардан кейін ортақ шешімге келу мүмкін болды.
«ҚҚС 16% болады. ҚҚС бойынша шекті мөлшер – 40 млн теңге көлемінде белгіленеді. 40 млн теңге – бұл біз қол жеткізген ымыра нәтижесі. Бірақ осы шекте біз 160 мың жаңа салық төлеушіден айырыламыз және шамамен 400 млрд теңге көлеміндегі қосымша түсімдерден қағыламыз. Мұны не үшін айтып отырмын – кәсіпкерлер Үкімет пен Парламенттің осындай ымыраға баруға дайын екенін түсінсе деймін», – деді вице-премьер.
Ол сондай-ақ жеке кәсіпкерлікті ашу тәртібі де қатаңдатылатынын қосты.
«Бізде тиісті нормалар дайын – бұрын құқық бұзушылық жасағандар үшін, әрекетсіз ЖШС немесе жеке кәсіптері барлар үшін жаңа ИП ашу процесі күрделенеді», – деп атап өтті вице-премьер.
