2025 жылғы 15–16 қазан күндері елордада өткен XII Азаматтық форумға «Жаңа адамдар» қозғалысының мүшелері қатысты. Форум аясында қоғамдағы өзекті өзгерістер мен азаматтық бастамалардың рөлі кеңінен талқыланды. Қоғамдық кеңестер форумының мінберінен сөз алған қозғалыс көшбасшысы Асель Баденова еліміздегі трансформациялық үдерістер мен азаматтық қоғамның ықпалы туралы өз пікірін білдірді.
Асель Баденова атап өткендей, бүгінгі таңда азаматтық қоғам елдегі өзгерістерге белсенді ықпал етіп отыр:
«Бүгінде қоғамның елде болып жатқан үдерістерге ықпалы айқын байқалады. Қоғамдық пікірмен санаспау қиын — дәл осы пікір қоғамдық күн тәртібін қалыптастырып, реттейді. Әлеуметтік желілердегі пікірлер кейде мінберден айтылған ресми мәлімдемелерден де қаттырақ естіледі», — деді ол.
Асан Умбетов — қоғам сеніміне ие еңбек адамы
«Жаңа адамдар» қозғалысы Асан Умбетовтің «Қазақстан темір жолы» компаниясындағы маңызды лауазымға тағайындалуын қоғамның шынайы қолдауымен байланыстырады.
«Асан Умбетовтің резонансты бейнежазба мен қазақстандықтардың әлеуметтік желілердегі кең қолдауынан соң ҚТЖ-дағы маңызды лауазымға тағайындалуы — еңбек адамдарының бүгінгі таңда қоғам назарында екенін айқын көрсетеді. Оларды қорғайды, қолдайды және үлгі етеді», — деді Асель Баденова.
Қозғалыс көшбасшысы жаңа буын лидерлерінің қалыптасуында кәсібіне адалдық пен азаматтық жауапкершілік шешуші рөл атқаратынын атап өтті:
«Өз ісіне деген сүйіспеншілік, отансүйгіштік және бейжай қарамау — жаңа форматтағы көшбасшыларды қалыптастырудың шешуші факторлары мен үрдістеріне айналуда. Олар өз еңбегімен, ұстанымымен және шынайылығымен қоғам сеніміне ие болып отыр», — деді ол.