Бүгін, 17:40
Мексикада жеңіл моторлы ұшақ апатқа ұшырап, төрт адам көз жұмды. Daily Tribune мәліметінше, оқиға 2 сәуірде түскі уақытта Пуэбла штатында, Санта-Ана-Хальмимильюлько ауданында (Уэхоцинго муниципалитеті) болған, деп хабарлайды kznews.kz.
Жергілікті билік деректеріне сәйкес, Cessna 172 жеңіл ұшағы Пуэбладағы Сердан бауырлар атындағы халықаралық әуежайдан ұшқаннан кейін бірнеше минут ішінде апатқа ұшыраған. Ол Поса-Рикаға бет алған, бірақ ұшып кеткеннен кейін бірден өнеркәсіптік парк маңындағы далаға құлаған. Алғашқы ақпарат бойынша бортта төрт адам болған. Үшеуі оқиға орнында қаза тауып, біреуі ауруханаға жеткізілгенімен, кейіннен көз жұмған.
Әлеуметтік желілерде апат сәті бейнежазбасы тарады. Кадрларда ұшақ ұшып кеткеннен кейін биіктігін жоғалтып, басын төмен қарай бұрып, жерге соғылып жатқан сәті көрінеді.
Financial Express хабарлауынша, Федералдық азаматтық авиация агенттігі ұшақ ұшып кеткеннен кейін бірнеше минуттан соң диспетчерлермен байланысын жоғалтқанын мәлімдеген. Куәгер Висенте Эрнандестің айтуынша, ұшқыш ұшақты басқаруға тырысқан, бірақ ұшақ тым төмен ұшып кеткен. Апаттың ресми себебі әлі жарияланған жоқ.
Жергілікті БАҚ мәліметі бойынша, Мексика федералдық авиация қызметтері апаттың себептерін тергеуді бастаған. Айта кетейік, жақында Нью-Йорк әуежайында Air Canada Express ұшағы қону кезінде өрт сөндіру көлігімен соқтығысқан, ұшақта шамамен 100 жолаушы болған, ондаған адам жарақат алған.
