Бүгін, 15:57
Шай мен кофе ішу – көпшіліктің күнделікті әдеті.
Алайда сүйікті сусыныңызды тым ыстық күйінде ішу денсаулыққа зиян келтіруі мүмкін. Ғалымдар мұндай әдеттің өңеш обырының даму қаупімен байланысты екенін анықтады, деп хабарлайды kznews.kz
Оксфорд университетінің зерттеушілері 1 миллионға жуық адамның деректерін талдап, ыстық сусындарды тұтыну мен өңеш обырының арасындағы байланысты зерттеген. Нәтижесінде сусынның қаншалықты жиі ішілетіні ғана емес, оның температурасы да маңызды екені белгілі болды.
Зерттеу деректеріне сүйенсек, өте ыстық шай немесе кофе ішетін адамдарда өңештің жалпақ жасушалы обырының даму қаупі жылы сусын ішетіндермен салыстырғанда үш еседен астам жоғары болған.
Ал күніне алты немесе одан көп кесе ыстық сусын ішетін адамдарда қатерлі ісіктің осы түріне шалдығу қаупі 71 пайызға жоғары екені анықталған.
Бір қызығы, ғалымдар шай мен кофенің арасында айтарлықтай айырмашылық таппаған. Яғни мәселе сусынның түрінде емес, оның қаншалықты ыстық екенінде болуы мүмкін.
Мамандардың түсіндіруінше, жоғары температура өңештің шырышты қабығын зақымдауы ықтимал. Ал мұндай әсердің жиі қайталануы қатерлі ісіктің даму қаупін арттыратын факторлардың бірі болуы мүмкін.
Дегенмен зерттеу нәтижелері ыстық сусын ішкен әр адам міндетті түрде қатерлі ісікке шалдығады дегенді білдірмейді. Ғалымдар анықтаған байланыс аурудың нақты себебін толық дәлелдемейді.
Сондықтан мамандар шай мен кофеден біржола бас тартуға кеңес бермейді. Тек оларды қайнап тұрған күйінде ішпей, сәл салқындағанын күткен дұрыс.
Дүниежүзілік денсаулық сақтау ұйымының қатерлі ісікті зерттеу жөніндегі халықаралық агенттігі 65 градустан жоғары температурадағы өте ыстық сусындарды өңеш обырының ықтимал канцерогендік факторы ретінде жіктеген.
