9 маусым, 2026
Астана халықаралық әуежайында қауіпсіздік тексеруі кезінде туындаған жағдай қоғамда қызу талқылануда. Қазақстандық блогер Айша Садвакасова әуежай қызметкерінің әрекетін заңсыз деп бағалап, сотқа жүгінуге ниетті екенін мәлімдеді, деп хабарлайды kznews.kz.
Оның айтуынша, ұшу алдындағы тексеру кезінде металл детектордан ешқандай ескерту сигналы шықпағанына қарамастан, қауіпсіздік инспекторы сыртқы киімін шешуді талап еткен. Кейін жолаушы контактісіз сканерден өткен. Алайда тексеруден соң қызметкер оны қайта тоқтатып, көпшіліктің көзінше қосымша тексеру жүргізген.
Блогер бұл әрекет кезінде өзінің жеке шекарасы бұзылғанын айтып, әуежай әкімшілігін шақырған. Оның сөзінше, оқиға орнына келген басшылық өкілдері қызметкердің әрекетін дұрыс емес деп танып, кешірім сұраған. Кейін қауіпсіздік қызметінің өкілі де кешірім білдірген.
Айша Садвакасова қазіргі уақытта заңгерлермен бірге әуежайдағы тексеру тәртібі мен ішкі регламенттерді зерттеп жатқанын айтты. Ол әйелдердің жеке құқығы мен ар-намысы қоғамдық орындарда да сақталуы тиіс екенін атап өтті.
Блогердің мәлімдеуінше, ол аталған оқиғаға байланысты сотқа жүгініп, прокуратураға шағым түсіру мәселесін қарастырып жатыр.
