Бүгін, 20:25
Интерпол желісі арқылы халықаралық іздеуде жүрген қазақстандық блогер Қайсар Қамза Вьетнамда ұсталды. Ол заңсыз ойын бизнесін ұйымдастырды деген күдікке ілінген, деп хабарлайды kznews.kz.
Ішкі істер министрлігінің мәліметінше, Вьетнамның құқық қорғау органдарымен бірлескен іс-қимыл нәтижесінде күдікті Камрань қаласында қолға түскен. Операция Интерпол арналары арқылы жүзеге асқан.
Тергеу деректеріне сәйкес, 2,4 миллионнан астам оқырманы бар блогер әлеуметтік желілерде онлайн-казиноны жарнамалап, пайдаланушыларды құмар ойындарға тартумен айналысқан.
Алдын ала ақпарат бойынша, ол осы әрекеттері арқылы 100 миллион теңгеден астам заңсыз табыс тапқан. Қаражат криптовалюта әмияндары арқылы аударылып отырғаны анықталған.
Қазіргі уақытта күдіктіні Қазақстанға экстрадициялау мәселесі қарастырылып жатыр.
