Бүгін, 08:41
Мәдениет және ақпарат министрі Аида Балаева әлеуметтік желідегі парақшасында Құрылтай депутаттарына қатысты тараған түрлі әңгімелер мен әлеуметтік желідегі буллинг мәселесіне қатысты пікір білдірді. Ол әсіресе депутаттардың тұрғын үйіне байланысты тараған ақпараттарға тоқталды, деп хабарлайды kznews.kz.
Министрдің айтуынша, Мемлекет басшысының тапсырмасына сәйкес мәдениет пен медиа саласында еңбек ететін мамандарды баспанамен қамтамасыз ету мәселесі жүйелі түрде шешіліп келеді.
Балаева тұрғын үй беру тәртібінің де өзгергенін атап өтті. Бұрын пәтерлер редакциялар ұсынған тізім негізінде берілсе, қазір баспана тек өз атында жылжымайтын мүлкі жоқ сала қызметкерлеріне ғана қарастырылады.
Сонымен қатар министр мемлекеттік органдар мен Құрылтай депутаттары журналистер қойған сұрақтарға барынша түсініктеме беруге тиіс екенін айтты.
Алайда Аида Балаева журналистердің кәсіби әдепті сақтауы маңызды екенін ескертті. Оның сөзінше, арандату, адамның соңынан қуалау, жеке басына тиісу және түрлі айла қолдану журналистика талаптарына сай емес.
