Бүгін, 09:38
Қазақстанда TikTok желісіндегі әдепсіз әрекеттері үшін үш адам жауапқа тартылды. Полиция әлеуметтік желіге жүргізген мониторинг нәтижесінде екі азамат әкімшілік қамауға алынып, тағы бір тұрғынға айыппұл салынды.
Қызылордада 39 жастағы Жұлдызай Құдайбергенова TikTok-тағы тікелей эфир кезінде бірнеше рет балағат сөз айтқан. Полиция оның жеке басын анықтап, іс сотқа жолданды. Сот әйелге айыппұл салды, деп хабарлайды kznews.kz.
Шымкентте 23 жастағы Нұрболсын Жақсылық TikTok-та бейәдеп сөздер айтып, қоғамдағы әдеп нормаларын өрескел бұзғаны үшін жазаланды. Сот шешімімен ол жеті тәулікке әкімшілік қамауға алынды.
Ең қатаң жаза Астана тұрғынына тағайындалды. Полиция әлеуметтік желіден ер адамның келмей қалған клиентті балағаттап, жасыл түсті заттың түтінін әдейі үрлеп тұрған видеосын анықтаған.
Ол медициналық куәландыруға жіберіліп, тексеру есірткі қолданғанын растады. Ер адамға қатысты ұсақ бұзақылық және есірткіні медициналық емес мақсатта тұтыну деректері бойынша екі хаттама толтырылды.
Сотта астаналық өз кінәсін мойындады. Екі құқық бұзушылықтың жиынтығы бойынша ол 20 тәулікке әкімшілік қамауға алынды.
Осылайша, TikTok-тағы бір тікелей эфир айыппұлмен, ал екі видео жеті және 20 тәулікке қамаумен аяқталды.
