Павлодар облысында вейптің заңсыз айналымымен айналысқан төрт адам ұсталды, деп хабарлайды kznews.kz Қаржы мониторингі агенттігінің өңірлік департаментіне сілтеме жасап хабарлайды.
Тергеу мәліметінше, күдіктілер Telegram мессенджеріндегі үш онлайн-дүкен арқылы вейп өнімдерін негізінен оқушылар мен жастарға сатып отырған. Заңсыз сауда нәтижесінде жалпы құны 400 миллион теңгеден асатын 53 мыңнан астам вейп тәркіленді.
Қылмыстық жолмен алынған табысты қолма-қол ақшаға айналдыру үшін олар банк карталары рәсімделген дропперлерді пайдаланғаны анықталды.
Қаржы мониторингі агенттігінің хабарлауынша, сот санкциясымен заңсыз табысқа сатып алынған үш автокөлікке – Toyota Land Cruiser, Toyota Highlander және Chevrolet Camaro маркалы көліктерге арест қойылды.
Қазіргі уақытта сотқа дейінгі тергеу амалдары жалғасып жатыр.
