Бүгін, 09:31
Еліміздің бірнеше өңіріндегі ірі қалаларда бүгін ауаның сапасы төмендеуі ықтимал, деп хабарлайды Kznews.kz.
«Қазгидромет» таратқан мәліметке сәйкес, 19 наурызда Қостанай, Павлодар, Өскемен, Риддер, Орал, Ақтөбе, Алматы және Астана қалаларында ауаның ластануына қолайсыз метеорологиялық жағдай қалыптасуы мүмкін.
Мамандардың түсіндіруінше, мұндай жағдай атмосфералық ауаның жерге жақын қабатында зиянды заттардың шоғырлануына әсер ететін қысқамерзімді табиғи факторлармен байланысты. Олардың қатарына тымық ауа райы, әлсіз жел, тұман және инверсия жатады.
Синоптиктердің айтуынша, осындай метеожағдай кезінде елдімекендерде ауа алмасуы баяулап, ластаушы қалдықтар тарамай, бір орында жиналып қалуы мүмкін. Соның салдарынан тұрғындар тыныс алатын ауаның сапасы уақытша нашарлайды.
Әсіресе, тыныс жолдарына қатысты созылмалы ауруы бар азаматтарға, балалар мен қарттарға сақтық шараларын күшейту ұсынылады.
