Сауд Арабиясының астанасы Эр-Риядтағы халықаралық әуежайдың жолаушылар терминалына 11 қазан күні тағы шабуыл жасалды. Бір күн бұрын әуежайға жасалған соққыдан кемінде 12 адам қаза тауып, жүздеген адам жараланған еді. Қаза тапқандардың арасында АҚШ азаматы да бар, деп хабарлайды kznews.kz CBS News басылымына сілтеме жасап.
Сауд Арабиясының билігі соңғы шабуыл кезінде әуежайдың ішкі рейстерге қызмет көрсететін 3 және 4-терминалдары орналасқан аумақта адамдардың жараланғанын хабарлады. Зымыран соққысынан кейін әуежай 10 қазаннан бері жабық тұр. Соңғы бес күнде нысанға төрт рет шабуыл жасалған.
10 қазандағы соққыдан 12 адам қаза тауып, тағы 309 адам жараланған. Зардап шеккендердің кейбірінің жағдайы ауыр.
Хуситтердің әскери өкілі, бригадалық генерал Яхья Сари Telegram-арнасында Сауд Арабиясының Йеменге қарсы әрекеттеріне жауап ретінде шабуыл жасалғанын мәлімдеді.
“Бұл — Сауд Арабиясының еліміз бен халқымызға қарсы қатыгез агрессиясына берілген жауап”, – деді ол.
Ол соңғы 24 сағат ішінде Сауд Арабиясы хуситтер бақылауындағы Йемен аумағына 120-дан астам әуе соққысын жасағанын мәлімдеді.
BBC News хабарлауынша, хуситтер Сауд Арабиясындағы басқа да нысандарға шабуыл жасаған. Олардың қатарында Aramco ұлттық мұнай-газ компаниясына тиесілі Шугадам газ нысаны, Танаджиб мұнай өңдеу зауыты және Даммам қаласындағы Король Фахд халықаралық әуежайы бар.
Сауд Арабиясының азаматтық авиация басқармасы Король Фахд әуежайына жасалған шабуылды растады.
Сауд Арабиясы билігі хуситтердің жаңа шабуыл жасау қаупіне байланысты Эр-Риядтағы мектептерді онлайн оқыту форматына көшірді. Ал әуе рейстері басқа әуежайларға бағытталды.
АҚШ, Ұлыбритания, Германия, Аустралия және Канада азаматтарына әуежайға бармауға кеңес берді.
10 қазан күні хуситтер Сауд Арабиясының әуежайларына жаңа шабуылдар жасайтынын ескерткен. Тұрғындардан Мекке мен Мәдинадағы қасиетті орындардан басқа әуежайларға бармауды сұраған.
“Әуежайлар мен әуе кеңістігі шабуыл нысанасына айналуы мүмкін және біздің күшіміздің операциялық аймағына кіреді”, – деп жазды Яхья Сари X әлеуметтік желісінде.
Ол жұртшылықты ескертулеріне байыппен қарауға шақырды.
11 қазан күні хуситтер Йемен астанасы Сана қаласындағы өз бақылауындағы әуежайға да қайтадан соққы жасалғанын хабарлады. Олар шабуылға Сауд Арабиясын айыптағанымен, қосымша мәлімет бермеді.
10 қазан күні жасалған шабуыл БҰҰ мен бірқатар ел басшыларының наразылығын тудырды. АҚШ президенті Дональд Трамп хуситтерге қарсы Сауд Арабиясының соққыларына АҚШ-тың да қосылу мүмкіндігін қарастырып жатқанын айтты.
АҚШ мемлекеттік хатшысы Марко Рубио Сауд Арабиясына жасалған шабуылдарды қатаң айыптады. Оның айтуынша, қаза тапқандар арасында АҚШ азаматы да болған.
АҚШ Мемлекеттік департаментінің өкілі Трамп әкімшілігі Сауд Арабиясындағы серіктестерімен тығыз байланыста екенін хабарлаған.
Еуропалық комиссия төрайымы Урсула фон дер Ляйен Иран қолдайтын күштердің шабуылдары Таяу Шығыстағы жағдайды одан әрі ушықтырып жатқанын айтты. Оның сөзінше, бұл шабуылдар халықаралық тасымал мен энергетика саласының қалыпты жұмысына кедергі келтіреді.
Израиль премьер-министрі Биньямин Нетаньяху да Эр-Рияд әуежайына жасалған шабуылды айыптап, қаза тапқандардың жақындарына көңіл айтты.
Қаза тапқандар арасында бірнеше елдің азаматтары бар
Сауд Арабиясының билігі 10 қазандағы шабуылдан қаза тапқандардың арасында төрт саудиялық, екі Бангладеш азаматы, Палестина, АҚШ, Мысыр, Иордания, Сирия және Судан азаматтары болғанын хабарлады.
Ал Қазақстанның Сыртқы істер министрлігі қаза тапқандар мен зардап шеккендер арасында Қазақстан азаматтары жоқ екенін хабарлады.
Ал соққы жасалғанда жараланған 309 адам бірнеше ауруханаға жеткізілген. Олардың кейбірінің жағдайы ауыр.
Мысырдың мемлекеттік Al-Qahera News телеарнасының мәліметінше, қаза тапқандардың бірі – Сауд Арабиясының Flynas әуе компаниясында жұмыс істеген 28 жастағы бортсерік Азза Рамзи.
Үндістанның Сауд Арабиясындағы елшілігі де 11 қазан күні жасалған шабуылдан жараланған Үндістан азаматының ауруханада көз жұмғанын хабарлады.
Бұған дейін апта ішінде Король Халид халықаралық әуежайына жасалған шабуылдардан үш саудиялық, соның ішінде бір ұшқыш қаза тапқан. CBS News мәліметінше, әуежай аумағында әскери нысандар жоқ.