Қайғылы оқиға 15 қарашаға қараған түні Уста Абдухалил көшесінде болған. Қырғызстан Төтенше жағдайлар министрлігінің мәліметінше, өрт туралы хабарлама құтқару қызметіне таңғы сағат 04:42-де түскен.
Қырғызстанның Ош қаласында жеке тұрғын үйден өрт шығып, бір отбасының кәмелетке толмаған үш қызы көз жұмды. Балаларын аман алып қалуға әрекеттенген әкесі денесінің 60 пайызын күйік шалып, ауруханаға жеткізілді, деп хабарлайды kznews.kz.
Оқиға орнына жеткен өрт сөндірушілер жалынды сағат 05:20-да оқшаулап, 07:57-де толықтай сөндірген. Өрт шамамен 120 шаршы метр аумақты шарпыған.
Үйді тексеру барысында 2013, 2016 және 2018 жылы туған үш қыздың мәйіті табылған. Алдын ала дерекке сүйенсек, ата-анасы бес баласының екеуін сыртқа шығарып үлгерген. Ал қалған үш қызын құтқаруға ұмтылған әкесі ауыр жарақат алған. Дәрігерлер оның денесінің шамамен 60 пайызын күйік шалғанын анықтап, Ош облыстық ауруханасына жатқызған.
Алдын ала болжам бойынша, өртке электр сымдарының қысқа тұйықталуы немесе электр жылытқышының істен шығуы себеп болуы мүмкін. Дегенмен өрттің нақты неден шыққаны әзірге белгісіз.
Қазіргі уақытта оқиғаның мән-жайы анықталып, тиісті тексеру жұмыстары жүргізіліп жатыр.