Бүгін, 10:11
Ұлыбританияның қорғаныс министрі Джон Хили мінген Корольдік әуе күштерінің ұшағы Ресей шекарасына жақын аумақта GPS сигналын жоғалтқан. Осыған байланысты экипаж үш сағатқа созылған сапар барысында балама навигациялық жүйені пайдалануға мәжбүр болған, деп хабарлайды kznews.kz.
Press Association агенттігінің мәліметінше, оқиға Джон Хилидің Эстониядағы британдық әскери қызметкерлермен кездесуден кейін Ұлыбританияға қайтып келе жатқан кезінде болған. Бұл туралы алғашқылардың бірі болып The Times басылымы хабарлаған.
Британдық ақпарат құралдары GPS сигналы Ресей шекарасына жақындаған кезде әдейі бұғатталуы мүмкін екенін жазды. Кейбір басылымдар мұның артында Ресей тұруы ықтимал деген болжам келтірген. Алайда Ресей тарапы бұл ақпаратқа қатысты ресми түсініктеме берген жоқ.
GPS жүйесі ұшу кезінде қолжетімсіз болғандықтан, ұшқыштар басқа навигациялық құралдарға сүйенген. Дегенмен қорғаныс министрі отырған ұшақтың әдейі нысанаға алынғаны туралы нақты дерек жоқ.
The Times мәліметінше, ұшақтың бағыты әуе кемелерінің қозғалысын бақылайтын ашық сервистерде көрініп тұрған. Бортта министрмен бірге журналистер мен фотографтар да болған.
Жолаушыларға Dassault Falcon 900LX ұшағының қауіпсіздігіне ешқандай қатер төнбегені хабарланған.
Ұлыбритания Қорғаныс министрлігіндегі аты-жөні аталмаған дереккөз болған жағдайды Ресей тарапынан жасалған ықтимал араласу деп бағалаған. Оның сөзінше, британдық әуе күштері мұндай кедергілерге қарсы әрекет етуге дайын.
