Бүгін, 09:41
Ұлыбритания қорғаныс министрі Джон Хили мінген Корольдік әуе күштерінің ұшағы Ресей шекарасына жақын аумақта GPS сигналынан айырылған, деп хабарлайды kznews.kz.
Оқиға министр Эстониядағы британдық әскери қызметшілермен кездесуден кейін Ұлыбританияға қайтып келе жатқан кезде болған.
Британдық БАҚ мәліметінше, GPS сигналы үш сағатқа жуық ұшу барысында қолжетімсіз болып, экипаж балама навигациялық жүйелерді пайдалануға мәжбүр болған.
Алдын ала болжам бойынша, навигациялық сигнал Ресей шекарасына жақын жерде әдейі бұғатталған болуы мүмкін. Бірқатар британдық басылым бұл жағдайға Ресейдің қатысы болуы ықтимал екенін жазды. Алайда Ресей тарапы мұндай болжамдарға ресми түсініктеме берген жоқ.
Сонымен қатар Джон Хилидің өзі арнайы нысанаға алынғаны туралы нақты дерек жоқ.
The Times мәліметінше, Dassault Falcon 900LX ұшағының бағыты әуе кемелерін бақылауға арналған ашық платформалардан көрініп тұрған. Бортта қорғаныс министрінен бөлек журналистер мен фотографтар да болған.
Жолаушыларға ұшақтың қауіпсіздігіне ешқандай қатер төнбегені айтылған. Соған қарамастан оқиға Ұлыбританияда алаңдаушылық туғызды.
Ұлыбритания Қорғаныс министрлігіндегі дереккөздердің бірі болған жағдайды Ресей тарапынан болуы мүмкін араласумен байланыстырған. Британ тарапы әскери ұшқыштардың мұндай жағдайларда әрекет етуге дайын екенін мәлімдеген.
