Бүгін, 09:27
Қызылорда облысы Жаңақорған ауданында бірнеше күн бұрын жоғалып кеткен 20 жастағы жігіттің денесі құдықтан табылды. Оқиғаға байланысты "Адам өлтіру" бабы бойынша қылмыстық іс қозғалған, деп хабарлайды kznews.kz.
Алдын ала мәлімет бойынша, жас жігіт түнде үйінің ауласында жатқан. Таңертең оның жоғалып кеткені белгілі болған соң, туыстары өз бетімен іздеу жұмыстарын бастаған.
Бір тәуліктен кейін марқұмның денесі үйінен шамамен 400 метр жердегі су құбырына тиесілі құдықтан табылған.
Туыстары оның денесінде көгерген іздер болғанын, мойын тұсынан жіпке ұқсас белгі байқалғанын айтқан. Кейбір мәліметте мәйіттің көрпеге оралған күйде табылғаны көрсетіледі.
Құқық қорғау органдары күдікті ретінде марқұмның 15 жастағы туған інісін ұстаған. Ол сот санкциясымен қамауға алынған.
Алайда ата-анасы бұл нұсқамен келіспейді. Олардың сөзінше, жасөспірімнің ағасына қастандық жасағанына сену қиын.
Отбасы бұған дейін үйден ақша жоғалған жағдайлар болғанын айтып, қылмысқа өзге адамдардың да қатысы болуы мүмкін деген болжам білдірген. Олар істің жан-жақты әрі объективті тергелуін сұрап отыр.
Қазіргі уақытта тергеу жалғасуда. Жас жігіттің нақты неден қаза болғаны және оқиғаға кімнің қатысы бары тергеу барысында анықталмақ.
