Қаламқас кенішіндегі өрт сөндірілді
28 наурызда Маңғыстау облысындағы Қаламқас кенішіндегі өрт сөндірілді. Бұл туралы Қазақстан энергетика министрлігінің баспасөз хатшысы Нұрлыбек Жеңісбек хабарлады.
Министрлік өкілінің сөзінше, 28 наурызда түнгі сағат 1.05-те Қаламқас кенішіндегі №8237 ұңғымадан шыққан өрт сөндірілген. "Қазір газды судың атқылауы тоқтап, грифон жабылды", - деді Жеңісбек.
Жергілікті басылымдар Маңғыстау облыстық экология департаменті басшысының міндетін атқарушы Руслан Төкеновке сілтеме жасап, "мұнайдың сыртқа шықпағанын" жазған.
Қаламқас кенішінен өрт, биліктің хабарлауынша, 25 наурызда таңғы 5.46-да шыққан.
Маңғыстау облысындағы "Қаламқас" кенішіндегі ұңғымалардың бірінде апат болып, сыртқа газ-су қоспасы шықты деген ақпарат тараған.
"Қаламқас" кенішін барлаумен - "Маңғыстаумұнайгаз" компаниясы, бұрғылаумен "Si Bu" инженерлік бұрғылау компаниясы айналысады.
Azattyq
