Бүгін, 11:16
Қайын жұртын өлтірді деген күдікпен тергеліп жатқан атыраулық Сұлтан Сәрсемалиевке қатысты қылмыстық іс сотқа жолданды. Бұл туралы мәлімет сот кабинетіндегі деректерде көрсетілген, деп хабарлайды kznews.kz.
Іс Атырау облысының қылмыстық істер жөніндегі мамандандырылған ауданаралық сотында қаралады. Қылмыстық істі судья Зарема Хамидуллина жүргізеді. Айта кетейік, дәл осы судья бұған дейін қоғамда үлкен резонанс тудырған Яна Легкодимова ісін қарап, айыпталушыларды өмір бойына бас бостандығынан айырған болатын.
Сұлтан Сәрсемалиевке қатысты істің нақты қай баптар бойынша қаралатыны әзірге ашық жарияланбаған. Сот кабинетінде қылмыстық істің көпшілікке қолжетімді еместігі көрсетілген.
Сонымен қатар сотталушылар тізімінде қаза тапқан отбасының кенже қызы Ақбаян Мұқанғалиеваның аты-жөні жоқ екені назар аудартты.
Сот кабинетіндегі ақпаратқа сәйкес, қылмыстық іс судьяның қарауына 8 мамыр күні берілген.
