Бүгін, 18:00
Атырау облысы аумағында жұбайының отбасының төрт мүшесін өлтірді деп айыпталған Сұлтан Сәрсемәлиев ісі бойынша резонансты сот процесі басталды, деп хабарлайды kznews.kz.
Сот отырысында прокурор Сұлтан Сәрсемәлиевтің Ақбаян Мұқанғалиевамен қалай танысқанын айтып берді. Айыптау мәліметінше, олар 2016 жылы Атырау қаласында араласа бастаған, ал мамыр айында ресми түрде некеге тұрған. Отбасында бес бала дүниеге келген.
Кейін ерлі-зайыптылар арасында жанжалдар басталған. Сотта айтылғандай, кикілжіңдердің себебі бірге тұру мәселесіне қатысты келіспеушіліктер болған. Әйелінің туыстары бөлек көшіп, Ақбаянның отбасының жанында тұруды ұсынған. Алайда Сәрсемәлиев анасын тастап кетпейтінін айтып, бұдан бас тартқан.
Осыдан кейін олардың қарым-қатынасы нашарлап, 2022 жылы сот арқылы ресми түрде ажырасқан. Балалар анасымен қалған. Ақбаян үш баласымен бірге Нұрсая шағынауданына көшіп кеткен.
Айыптау тарабы кісі өлтіру оқиғасының егжей-тегжейін де баяндады.
«...Қылмыстың ізін жасыру үшін Сәрсемәлиев сарайдың ішінен шамамен 1 метр 30 сантиметр тереңдікте шұңқыр қазып, мәйіттерді сонда көмген және үстін линолеуммен жапқан. Осыдан кейін ол қылмыстық әрекеттерін жалғастырған. Қарабалин сарайға кірген кезде, Сәрсемәлиев оны ішінде күтіп тұрған және жәбірленушінің арқасына, кеудесіне және қолдарына бірнеше рет пышақ жарақатын салған. Ауыр жарақат салдарынан Қарабалин есін жимастан оқиға орнында көз жұмды», – деді прокурор сотта.
Тергеу нұсқасы бойынша, Наурыз Мұқанғалиевті өлтіргеннен кейін Сәрсемәлиев қылмыстың ізін жасырып, мәйіттен құтылуға шешім қабылдаған. Сотта айтылғандай, ол түнде үй ауласынан күрек алып, жер телімінің оңтүстік-батыс жағындағы қоршау маңынан шұңқыр қаза бастаған. Айыптау мәліметінше, түнгі сағат үштер шамасында ол тереңдігі бір метрден асатын әрі ені шамамен 80 сантиметр болатын шұңқыр қазып шыққан.
Одан кейін, тергеу болжамынша, Сәрсемәлиев марқұмның қалталарын қарап, жеке куәлігін, «Қазпошта» банк картасын, құны шамамен 50 мың теңге тұратын Samsung A21 телефонын және 3 мың теңге қолма-қол ақшасын алып кеткен. Кейін прокуратура нұсқасы бойынша, ол Мұқанғалиевтің мәйітін үйдегі кілемге орап, алдын ала дайындалған шұңқырға сүйреп апарып, таңғы сағат беске дейін көміп тастаған.
Прокурор шабуылдар кезінде ет бөлетін пышақ қолданылғанын да мәлімдеді. Тергеу дерегінше, дәл осындай тәсілмен кейін Нәсіп Өтешқалиева да өлтірілген.
Сонымен қатар, тергеу мәліметіне сәйкес, 2023 жылдың басында Сәрсемәлиев отбасымен қарым-қатынасты қайта қалпына келтіруге шешім қабылдаған. Ол Атыраудан үй жалдап, бұрынғы жұбайы және балаларымен қайта бірге тұрған.
Еске салайық, Жангелдин ауылында тұратын отбасы 2025 жылдың қараша айында белгісіз жағдайда жоғалып кеткен. Көршілердің айтуынша, алдымен отбасының ұлы жоғалып, кейін бүкіл отбасы медициналық көмек алу үшін кетіп қалған деген болжам болған. Ерлі-зайыптылардың мәйіттері 6 қаңтарда өз үйінің ауласындағы сарайдан көмілген күйде табылды. БАҚ мәліметінше, туыстары ұзақ уақыт полицияға жүгінбеген, себебі отбасының 32 жастағы ұлының атынан хабарламалар келіп тұрған.
2026 жылдың ақпан айының соңында Қазақстан Ішкі істер министрлігі Индонезиядан күдіктінің ұсталған сәтінен кадрлар жариялады. Сол жерден отбасының кенже қызы – Ақбаян Мұқанғалиева да табылған.
Күдікті ұсталғаннан кейін қалған отбасы мүшелерінің мәйіттері болуы мүмкін жерлерді көрсеткен. Қайта жүргізілген тергеу әрекеттері кезінде Атыраудағы үй ауласынан бұрын хабар-ошарсыз кеткен ұл мен қыздың мәйіттері табылды. Кейін Жангелдин ауылында Максот Қарабалин мен Нәсіп Өтешқалиеваның балалары жерленді. Наурыз 32 жаста, Мейрамгүл 35 жаста болған. Олар ата-аналарының қасына жерленген.
