16 сәуір, 2020
"Шарапат" әлеуметтік орталығында 380 адам тексерістен өтті. Олардың 18-і коронавирус инфекциясын жұқтырғаны анықталды
НҰР-СҰЛТАН, 16 сәуір – Sputnik. Елорданың денсаулық сақтау басқармасы қарттар үйіндегі тексерістің нәтижесін жариялады, деп хабарлайды Sputnik Қазақстан тілшісі.
Басқарма басшысы Сәуле Қисықованың айтуынша, бас мемлекеттік санитар дәрігердің қаулысы бойынша Нұр-Сұлтан қаласында медициналық-әлеуметтік мекемелердің қызметкерлері мен тұрғындары арасында тексеріс шаралары жүргізілген.
"Осылайша "Шарапат" әлеуметтік орталығында 380 адам тексерістен өтті. 306-сы – сол жерде тұратын адамдар болса, 74-сі – қызметкерлер. Олардың ішінде коронавирус инфекциясын жұқтырған 18 адам анықталды. Барлығы тиісті хаттама бойынша ем алып жатыр", - деді Қисықова бүгінгі онлайн брифингте.
Айта кеткен жөн, бұған дейін "Шарапат" әлеуметтік орталығында 7 қызметкерден COVID-19 инфекциясы табылған болатын.
Тұмаудың белгілері байқалса, не істеу керек – Қисықова тұрғындарға кеңес берді
Ал Ақмола облысына қарасты тағы бір қарттар үйінде 38 қариядан және 3 қызметкерден коронавирус табылды. Бұл мекеме астанаға жақын жерде орналасқан.
sputniknews.kz
