Бүгін, 13:36
Спортшының пікірінше, «Қазақ аруы» атауы тұтас ұлтқа қатысты болғандықтан, байқаудың мазмұны да осы атқа сай болуы керек.
Қазақстандық спортшы Қуат Хамитов Алматыда өткен «Қазақ аруы – 2026» байқауына қатысты пікір білдіріп, оның атауын өзгертуді ұсынды. Ол әлеуметтік желідегі жазбасында сайысқа қатысқан бойжеткендерді де сынға алды, деп хабарлайды kznews.kz.
«Бұл байқауды «Қазақ аруы» емес, «Баян аруы» деп өзгерту керек! «Қазақ» деген сөзді айтқанда, бұл бүкіл ұлтқа, бәрімізге қатысты болады», – деп жазды ол.
Сондай-ақ Хамитов ел ішінде сұлулығымен қатар тәрбиесімен де ерекшеленетін қыздардың көп екенін айтып, байқауға қатысушылардың мақсатын сынға алды.
«Біздің ұлтымызда әдемі, лайықты қыздар жетерлік. Ал бұлар назар жетіспегендіктен жүргендер. Олардың бұл байқауға не үшін қатысатынын бәріміз жақсы білеміз», – деді спортшы.
Еске салайық, 3 қарашада Алматыдағы Республика сарайында продюсер Баян Алагөзова ұйымдастырған «Қазақ аруы – 2026» ұлттық байқауы өтті. Сайысқа еліміздің әр өңірінен 22 бойжеткен қатысты.
